Menntun og heilbrigði

Eftir að sumarleyfi eru að mestu gengin yfir er daglegt líf og störf nú að falla í sinn eðlilega farveg.

Skólaárið að hefjast hjá grunnskólum

Í liðinni viku sat undirritaður mjög áhugaverða haustráðstefnu fræðslusviðs Reykjanesbæjar fyrir starfsfólk grunnskólanna í Reykjanesbæ og Suðurnesjabæ, nú við upphaf nýs skólaárs. Yfirskrift ráðstefnunnar var „Menntun og velferð fyrir alla: skóli margbreytileika, fjölmenningar og vináttu“. Vel var staðið að ráðstefnunni og þar voru flutt athyglisverð og góð erindi.

Heilsueflandi samfélag á Suðurnesjum

Nú í vikunni var undirrituð viljayfirlýsing um samstarf vegna heilsueflandi samfélags á Suðurnesjum. Að verkefninu standa sveitarfélögin á Suðurnesjum ásamt Heilbrigðisstofnun Suðurnesja, Sambandi sveitarfélaga á Suðurnesjum og Embætti landlæknis. Markmið með samstarfinu er að með markvissari hætti megi greina stöðu og leita lausna sem stuðla að heilbrigðum lifnaðarháttum, heilsu og vellíðan allra íbúa á Suðurnesjum. Þetta er spennandi samstarfsverkefni og mun vera í fyrsta skipti sem Embætti landlæknis og heilbrigðisstofnun taka upp samstarf við sveitarfélög í heilum landshluta um þetta málefni. Myndin að neðan sýnir áhrifaþætti heilbrigðis og vellíðunar og gefur ágætt yfirlit yfir þá fjölmörgu þætti sem horfa þarf til varðandi vellíðan allra íbúa samfélagsins.

Bæjarráð

Nú í vikunni fundaði bæjarráð Suðurnesjabæjar. Að venju voru ýmis og margvísleg mál á dagskrá. Fyrir fundinum lá m.a. minnisblað um aðgerðir vegna grindhvala sem syntu á land neðan við Útskálakirkju fyrir nokkru. Bæjarráð færir starfsfólki Suðurnesjabæjar og öllum þeim aðilum sem komu að aðgerðum fyrir þeirra framlag og vel unnin störf. Þá samþykkti bæjarráð umsögn um drög að flugstefnu fyrir Ísland og samþykkt var að taka tilboði í framkvæmd við hringtorg við Byggðaveg í Sandgerði, svo örfá mál séu nefnd.

Sandgerðisdagar

Framundan er bæjarhátíðin Sandgerðisdagar, sem mun standa yfir vikuna 26. ágúst – 31. ágúst. Sandgerðisdagar hafa verið haldnir um langt árabil á þessum árstíma og má segja að hátíðin móti skilin milli sumars og hausts. Dagskrá Sandgerðisdaga verður birt á næstu dögum og eru íbúar Suðurnesjabæjar og gestir hvattir til þátttöku og að njóta þeirra viðburða sem í boði verða.

Haustið minnir á sig

Veðuráttan undanfarið minnir okkur á að hausttíðin færist yfir. Dagarnir hafa flestir verið sólríkir en blásið hefur með norðanvindi sem hefur haldið hitastiginu í skefjum. Nú fer að renna upp árstími uppskeru og sláturtíðar, þar sem meðal annars fólk sækir berjalönd heim í þeim tilgangi að tína safarík og meinholl ber. Þótt svo sumarið hafi verið sólríkt og hlýtt í veðri um sunnan og vestanvert landið þá berast fregnir af því að berjaspretta sé frekar takmörkuð, sem er líkleg afleiðing af langvarandi þurrkum. Þó má eflaust finna gjöful berjasvæði sem gefa vel af sér.

Facebooktwittergoogle_plusmail

Sumartíð og grindhvalir

Tími sumarleyfa

Undanfarnar vikur hafa margir notið sumarleyfa. Bæjarhátíðir eru haldnar víða um land allar helgar sumarmánuðanna og margir ferðast um landið til að njóta náttúrunnar og samvista við fjölskyldur og vini. Veðrið á sunnan-og vestanverðu landinu hefur verið með besta móti þetta sumarið, en eins og yfirleitt er þá er veðurfarið með öðrum hætti á hinum helmingi landsins. Síðasta sumar var þessu alveg öfugt farið, þegar leiðinda tíð var meira og minna allt sumarið á sunnan-og vestanverðu landinu en gott sumarveður norðan-og austanlands. Sumarumferðin markast jafnan af veðrinu, eðlilega sækir landinn í góða veðrið þar sem það er hverju sinni. Mesta ferðahelgi sumarsins var um síðustu helgi, um Verslunarmannahelgina. Undirritaður sótti í fyrsta skipti Þjóðhátíð í Vestmannaeyjum og var það í senn mikil og ánægjuleg upplifun. Einmuna veðurblíða var í Eyjum alla helgina og var ánægjulegt að taka þátt í vel heppnaðri hátíð með þúsundum gesta sem dvöldu í Heimaey.

Grindhvalir í Garði

Verslunarmannahelgin var ekki tíðindalaus í Suðurnesjabæ. Á föstudags kvöldið syntu nokkrir tugir grindhvala á land á ströndina framan við Útskálakirkju í Garði. Skjótt var brugðist við og tókst að bjarga mörgum hvalanna af ströndinni á haf út, þannig að dýrin mættu ekki örlögum sínum á ströndinni. Eftir lá nokkur fjöldi dauðra hvala sem tókst að draga á haf og sökkva. Sú aðgerð var framkvæmd í samráði og með leyfi þar til bærra yfirvalda. Allar aðgerðir tókust mjög vel og margir tóku þátt í þeim. Framganga björgunarsveitafólks var aðdáunarverð, þar sem fagmennska og fumlausar aðgerðir báru þann árangur að þessum aðgerðum lauk á stuttum tíma. Þá voru öll samskipti og samstarf starfsfólks Suðurnesjabæjar við björgunarsveitir, stofnanir og aðra viðkomandi aðila til fyrirmyndar. Fyrir það þakkar Suðurnesjabær.

Það er ekki einfalt verkefni að takast á við aðstæður eins og þær sem komu upp við landgöngu grindhvalanna á föstudaginn. Það er athyglisvert hve slíkum atburðum hefur fjölgað undanfarin ár. Ýmist hafa hópar smáhvala hreinlega synt upp í fjörur, eða einstaka hvali hefur rekið á land. Stofnanir og stjórnvöld hafa mótað ákveðið verklag til að bregðast við slíkum atburðum, með ákveðnu samstarfi stofnana og ýmissa aðila. Hins vegar má læra af okkar reynslu af þessu máli og verður því komið á framfæri við viðkomandi stjórnvöld, en um þessar mundir er unnið að enn frekari útfærslu á viðbragðsáætlunum til að takast á við svona aðstæður. Þess má geta að áhersla er lögð á það, að ef fólk verður vart við einstaka hvali eða hvalahópa í fjörum, þá ber að tilkynna það til lögreglu sem virkjar viðkomandi viðbragðsaðila.

Framganga björgunarsveitarfólks við björgun grindhvalanna og hreinsun á ströndinni er aðdáunarverð. Þar sem mesta ferðahelgi sumarsins stóð yfir voru færri einstaklingar tiltækir til aðgerða en að öllu jöfnu, en þeir einstaklingar sem gáfu sig í verkefnið lögðu sig alla fram og skiluðu góðu verki. Björgunarsveitirnar sem tóku þátt í þessum aðgerðum fá sérstakar þakkir fyrir þeirra framlag, en það sýnir enn og aftur hve mikilvægar björgunarsveitirnar eru í okkar samfélagi og hve þeir einstaklingar sem starfa innan þeirra eru alltaf tilbúnir til aðgerða ef á þarf að halda.

Undirritaður þakkar einnig því starfsfólki Suðurnesjabæjar sem stóðu vaktina og tóku þátt í aðgerðum fyrir þeirra framlag. Þetta starfsfólk var að störfum alla Verslunarmannahelgina og fyrir það er þakkað.


Facebooktwittergoogle_plusmail

38. vika.

Reykjanes Jarðvangur er alþjóðlega viðurkenndur sem Unesco Global Geopark. Þessi viðurkenning er mikilvæg fyrir jarðvanginn, fyrir Suðurnes og atvinnustarfsemi á svæðinu, sérstaklega ef litið er til ferðaþjónustu. Margir ferðamenn sækjast eftir því að heimsækja jarðvanga víða um heiminn og því er mikilvægt að viðhalda alþjóðlegu viðurkenningunni undir merkjum Unesco. Nú í vikunni voru fulltrúar frá Unesco á ferð um Suðurnes, í þeim tilgangi að gera úttekt á Reykjanes Jarðvangi og leggja mat á hvort jarðvangurinn uppfylli áfram þær kröfur sem gerðar eru til þess að starfa undir merkjum Unesco. Fulltrúar Unesco fóru víða um svæðið, í fylgd með starfsfólki og fulltrúum Reykjanes Jarðvangs. Meðal annars heimsóttu þeir Garðskaga, Þekkingarsetrið í Sandgerði, Hvalsneskirkju og veitingahúsið Vitann í Sandgerði, sem er Geopark fyrirtæki. Fulltrúarnir skoðuðu einnig fjölmarga aðra staði í sveitarfélögunum á Suðurnesjum. Vonandi mun heimsókn fulltrúa Unesco og yfirferð um svæðið tryggja að Reykjanes Jarðvangur verði áfram viðurkenndur sem Unesco Global Geopark næstu fjögur árin, enda mikilvægt fyrir Suðurnesin.

Í sumar eru ýmsar framkvæmdir í gangi á vegum Suðurnesjabæjar, einstaklinga og fyrirtækja í sveitarfélaginu. Meðal annars hefur Suðurnesjabær ráðist í malbikun gatna, bæði nýrra gatna sem og til viðhalds og endurbóta á eldri götum. Í Sandgerði og Garði standa yfir framkvæmdir við uppbyggingu íbúðarhúsnæðis, bæði í nýjum og eldri íbúðahverfum. Það er ánægjulegt hve mikill kraftur er í uppbyggingu íbúðarhúsnæðis í báðum byggðarkjörnum sveitarfélagsins.

Á miðvikudaginn í þessari viku var haldin árleg Skötumessa í Miðgarði, sal Gerðaskóla. Að vanda var fjölmenni sem mætti og naut þess að borða skötu og annað fiskmeti sem Skólamatur framreiddi, ásamt því að njóta ýmissa skemmtiatriða. Ágóði af skötumessunni rennur jafnan til þess að styrkja góð málefni og voru styrkir afhentir undir lok dagskrár kvöldsins.

Veðrið hefur leikið við okkur á Suðurnesjum í sumar og hafa sumir haldið því fram að við höfum átt það inni frá síðasta sumri. Einna helst hefur verið hægt að kvarta undan langvarandi þurrki, en úr því hefur ræst að undanförnu enda gott fyrir gróðurinn. Útlit er fyrir áframhald á veðurblíðunni næstu daga.


Facebooktwittergoogle_plusmail

Vika undirskrifta samninga.

Þessi vika hefur verið óvenju annasöm fyrir bæjarstjórann, við að undirrita samninga. Í upphafi vikunnar var undirritaður samningur milli Suðurnesjabæjar og Reykjanesbæjar um þjónustukaup Suðurnesjabæjar af fræðsluskrifstofu Reykjanesbæjar. Um er að ræða framlengingu á fyrri samningi um að fræðsluskrifstofan veiti grunn-og leikskólum í Suðurnesjabæ faglega þjónustu. Þessi samningur gildir út skólaárið 2019-2020.

Suðurnesjabær vinnur að því í samstarfi við Sveitarfélagið Voga að undirbúa og byggja upp fræðsludeild til þjónustu við skólana. Í vikunni undirrituðu bæjarstjórar Suðurnesjabæjar og Sveitarfélagsins Voga samning um samstarf sveitarfélaganna við uppbyggingu og þróun fræðsludeildar, sem mun veita grunn-og leikskólum sveitarfélaganna faglega þjónustu. Fræðsludeildin mun taka við þessu verkefni þegar framangreindur þjónustusamningur við Reykjanesbæ rennur út. Það er ánægjulegt að eiga samstarf við Sveitarfélagið Voga um þetta verkefni, en sveitarfélögin hafa um árabil átt mjög gott samstarf um félagsþjónustu við íbúa sveitarfélaganna.

Á miðvikudaginn náðist mikilvægur áfangi í uppbyggingu á Suðurnesjum. Þá undirritaði bæjarstjórinn fyrir hönd Suðurnesjabæjar viljayfirlýsingu um samstarf Suðurnesjabæjar, fjármálaráðherra fyrir hönd Ríkissjóðs, Isavia og Reykjanesbæjar, um þróun og uppbyggingu á landi í eigu ríkisins í nágrenni við Keflavíkurflugvöll. Þetta er afrakstur mikillar vinnu þessara aðila mörg undanfarin ár, sem með góðri samvinnu hefur skilað þessum áfanga. Framundan er mikið verkefni við að skipuleggja, þróa og byggja upp þetta verðmæta landsvæði. Sveitarfélögin fara með skipulagsvald á svæðinu en ríkið er eigandi landsins, það er því mikilvægt að þessir aðilar eigi sem besta samvinnu um þetta þróunarverkefni. Unnið verður að þessu verkefni undir merkjum Kadeco, Þróunarfélags Keflavíkurflugvallar og munu sveitarfélögin leggja til sína fulltrúa í stjórn félagsins. Kadeco og Isavia hafa mörg undanfarin ár fylgst náið með svipuðum verkefnum í öðrum löndum, þar sem unnið er að skipulagi, þróun og uppbyggingu lands í næsta nágrenni við mikilvæga alþjóðaflugvelli. Vonandi tekst okkur vel til við þetta mikilvæga verkefni, í því felast mikil tækifæri til framtíðar og ríkir hagsmunir eru í húfi ekki aðeins fyrir Suðurnesin heldur íslenskt samfélag í heild.

Nú í vikunni var fundur í bæjarráði, þar sem að vanda voru mörg mál á dagskrá. Þar sem bæjarstjórn er í sumarleyfi frá reglulegum fundum hefur bæjarráð heimild til fullnaðarafgreiðslu mála og fyrir vikið er meira álag á bæjarráði en á öðrum tímum árs.

Nú í vikunni urðu umskipti í veðrinu. Eftir langvarandi þurrkatíð með sólskini nánast hvern dag snerist til suðlægari átta og hefur rignt nokkuð síðustu 2-3 daga. Þessi úrkoma var kærkomin fyrir gróðurinn, en hann var farinn að láta á sjá vegna þurrkatíðar.

Bæjarstjórinn og þar með molarnir, er kominn í tveggja vikna sumarleyfi og birtast næstu molar ekki fyrr en eftir miðjan júlí. Gleðilegt sumar.

Facebooktwittergoogle_plusmail

Suðurnesjabær í eitt ár

Þann 10. júní sl. var liðið eitt ár frá því sameinað sveitarfélag Sandgerðisbæjar og Sveitarfélagsins Garðs tók til starfa. Þetta fyrsta starfsár sveitarfélagsins hefur verið viðburðaríkt og annasamt. Unnið hefur verið að því að formgera sveitarfélagið, það hefur falið í sér að unnið hefur verið að mjög mörgum stórum og minni verkefnum. Þá hefur verið unnið að samræmingu margra hluta, þar sem mismunandi hefðir og venjur voru hjá fyrri sveitarfélögum.

Á þessu fyrsta ári hafa náðst margir áfangar í því verkefni að móta nýtt sveitarfélag. Einn af stóru áföngunum var þegar heiti sveitarfélagsins, Suðurnesjabær tók gildi þann 1. janúar 2019 og í framhaldi af því var unnið að hönnun byggðamerkis, sem endaði með því að full samstaða var í bæjarstjórn í mars sl. þegar byggðamerki Suðurnesjabæjar var samþykkt. Hönnun þess var unnin í samstarfi við auglýsingastofuna Hvíta húsið. Það var ánægjulegt og í senn styrkleikamerki hve bæjarstjórn var algerlega samstiga við ákvörðun um heiti sveitarfélagsins og byggðamerkis.

Byggðamerki Suðurnesjabæjar var staðfest samhljóða í bæjarstjórn í mars 2019. Merkið hefur fengið mjög jákvæðar viðtökur meðal íbúa sveitarfélagsins.

Fleiri merkir áfangar urðu í starfsemi Suðurnesjabæjar á fyrsta starfsárinu. Sem dæmi um það má nefna að bæjarstjórn samþykkti fyrstu fjárhagsáætlun Suðurnesjabæjar í desember sl., þá afgreiddi bæjarstjórn ársreikning fyrir árið 2018 í byrjun júní, en sá ársreikningur náði fyrri hluta ársins yfir rekstur gömlu sveitarfélaganna, en yfir rekstur Suðurnesjabæjar frá 1. júlí 2018. Hvor tveggja eru þetta merkir áfangar.

Hér er aðeins stiklað á stóru um fyrsta starfsár Suðurnesjabæjar, en margt fleira væri þess virði að fjalla um og verður það gert síðar. Það má segja að sveitarfélagið sem varð til fyrir ári síðan hafi farið gegnum mikilvægt þroskaskeið á sínu fyrsta ári. Framundan eru margar áskoranir sem unnið verður úr á næstu vikum, mánuðum og árum. Mótun nýs sveitarfélags lýkur ekki á einu ári, heldur er um langtíma verkefni að ræða. Hins vegar má fullyrða að vel hafi gengið hjá kjörnum fulltrúum og starfsfólki sveitarfélagsins að leysa fjölmörg verkefni á þessu fyrsta ári.

Facebooktwittergoogle_plusmail